БОЗДИДИ ИДОНА БАХШИДА БА 33-СОЛАГИИ АРТИШИ МИЛЛИИ ҶУМҲУРИИ ТОҶИКИСТОН ДАР АКСИЯИ «КОРВОНИ МОДАРОН», АЗ АФСАРОНУ САРБОЗОНИ ШӮҶОИ ВАТАН
Тибқи иттилои пешин, дар асоси Қарори Раиси шаҳри Душанбе муҳтарам Рустами Эмомалӣ «Дар бораи таҷлили Рӯзи таъсисёбии Қувваҳои Мусаллаҳи Ҷумҳурии Тоҷикистон дар шаҳри Душанбе» ва Нақшаи чорабиниҳои Мақомоти иҷроияи ҳокимияти давлатии ноҳияи Синои шаҳри Душанбе, бахшида ба 23-юми феврал санаи 11.02.2026 дар қисми ҳарбии 0119 Қушунҳои сарҳадии Кумитаи давлатии амнияти миллии Ҷумҳурии Тоҷикистон чорабинии тантанавӣ баргузор гардид.
Дар чорабинӣ муовини раиси ноҳияи Сино Ситора Сафарализода, муовини ректори Донишкадаи тиббӣ-иҷтимоии Тоҷикистон оид ба корҳои тарбия Убайдуллоҳзода М.А., ва кормандону донишҷуёни МТҒ «Донишкадаи тиббӣ-иҷтимоии Тоҷикистон», намояндагони Раёсати кор бо ҷавонон ва варзиши шаҳри Душанбе, бахши кор бо ҷавонон ва варзиши ноҳия, шуъбаҳои фарҳанг ва кор бо занон ва оила иштирок намуданд.
Зимни боздид меҳмонон бо шароити хизмати ҳарбиён, вазъи будубош ва сатҳи омодагии ҷангии сарбозон аз наздик шинос шуданд. Қайд гардид, ки ҳимояи марзу буми Ватан вазифаи муқаддаси ҳар як шаҳрванди кишвар буда, Қувваҳои Мусаллаҳи Ҷумҳурии Тоҷикистон ҳамчун сипари боэътимоди давлату миллат фаъолияти пурмасъулиятро ба роҳ мондаанд.
Ҳамзамон ба афсарон ва сарбозон ҳамоиши маърифатӣ ташкил гардида, вобаста ба дӯст доштани Ватан, иҷрои содиқонаю софдилонаи қарзи ҳарбӣ, ҳифзи арзишҳои миллӣ ва дигар мавзуъҳои муҳими рӯз аз ҷониби масъулин маърӯзаҳо ироа карда шуд. Зимни чорабинӣ Ситора Сафарализода бо сухани табрикотӣ баромад намуда, афсарону сарбозонро ба муносибати ин санаи таърихӣ самимона шодбош гуфт. Таъкид гардид, ки Қувваҳои Мусаллаҳ яке аз рукнҳои муҳими давлатдорӣ ба шумор рафта, ҳифзи Истиқлолият, субот ва амнияти кишвар аз вазифаҳои муқаддаси онҳо мебошад.
Боиси ифтихор аст, ки аз ҷониби масъулин ҳамчун нишони ғамхорӣ ва пайравӣ ба амалҳои накӯи роҳбарияти олии мамлакат, бахусус Пешвои муаззами миллат муҳтарам Эмомалӣ Раҳмон, барои афсарону сарбозон дастархони идона ороста шуд.
Дар фарҷоми чорабинӣ бо мақсади болидаруҳии хизматчиёни ҳарбӣ барномаи фарҳангӣ-консертӣ аз тарафи дастаи «Шифо»-и донишҷуёни МТҒ «Донишкадаи тиббӣ-иҷтимоии Тоҷикистон» пешниҳод гардида, фазои идона ва руҳияи баланди ватандӯстӣ муҳити қисми ҳарбиро фаро гирифт.